Nadica Zorc rođ. Galeković ponovno nas vraća šezdeset i više godina unazad. Prisjeća se na koji se način obilježavala korizma i kako se svakog dana molio križni put u Mraclinu. Moli se i danas u Mraclinu križni put, ali malo drugačije nego prije.
Kad je došla korizma saki se dan vu naše kapele svetog Vida molil križni put. Mi klinci samo smo se navek naganjali, i oko Zgrade i oko cirkve, ni bilo autov v selu, ni bilo straha da nas bu neko pogazil. Prek leta bake su molile krunicu, Katica Drevova je vodila, ali to mi deca nismo molili. Katica Drevova je bila jedna posebna žena, bila je hroma, nikad se ni udavala, ali bila je strašno pobožna, o njoj bi se dalo govoriti, ona je othranila Itu Dudu, sestru našeg dragog patera Bonaventure Dude. Uz Katicu Drevovu, sećam se i mamice Cvetnićke (Bara Cvetnić udana Kos), koja je isto bila posebna žena i vodila je brigu o cirkve, otklepala i zaklepala. Osim kaj je vodila brigu o cirkvu, mamica Cvetnićka je bila posebna po tome kaj je do kraja života nosila narodnu nošnju i vu nje je i pokopana 1967. godine. Lečila je i životinje i ljude, telila krave, nameštala kosti, skupljala bilje, trave i delala čajeve, k nje su dolazili ljudi z bregov i cijelog kraja. Jedina je znala otpetlati preju za tkanje ako se jako zapetlala. Kad je negdo mrl vu selu, odma se išlo po mamicu Cvetnićku, ona je prala i oblačila mrtvece, a kad se mrtvec nosil ze skolki u les, onda je kadila ze tamjanom. Mamica Cvetnićka je bila baka današnje zvonarice, naše drage tete Vere Garavine.
– Katica Drevova, mamica Cvetnićka i te starije žene znale su moliti krunicu, ali de bi te starije žene molile križni put, ni njima baš išlo čitanje, a nisu baš ni videle čitati, a nektere nisu ni znale čitati. I onda je Ana Cvetnić rođ. Galeković, Plavka smo ju zvali, ona je bila moja sestrična, vodila križni put. Prije ni bilo meši saki dan v Mraclinu, pa se križni put ni vodil navečer kak sad, nek se vodil popoldan, tak oko 4 vure. Mi klinci bi se već oko 3 vure skupljali oko cirkve, nas je bilo barem trideset, nekad i pedeset, puna cirkva. Najviše nas je bilo tu z centra, ajmo reči, ali dolazila su deca i z Obreži i Dolenca. V cirkve ni bilo klupi ko sad, cirkva je bila prazna, u čoškima je bilo par malih klupi za starije žene. A mi svi klinci smo išli oko Plavke koja je onda imala tak već petnaest, šesnaest let. Vu cirkve je gorela samo jedna žarulja, a cirkva je velika, ni bilo lusterov, onda je trebalo Plavke nositi sveču da bi videla čitati jer je bila kmica, i šamrlicu jer se križni put vodil naklekečke. I tak smo mi klinci išli za Plavkom od postaje do postaje križnog puta po cirkve. Ja sam se jako držala važna jer je ona moja sestrična, volela me jako, i ja sem nje nosila klupicu, šamrlicu. To mi je ostalo u sjećanju da sam se navek rivala da nosim klupicu. Starija deca su najčešće nosila sveču jer je trebalo paziti da se sveča ne gasi, a i žene su vikale na nas ako bi nam vosak curel po podu.
– Plavka je molila sve postaje, a mi smo išli za njom, i klečali smo na betonu za svaku postaju. Starije žene su na klupa sedele. Križni put su molile samo stare žene i deca, jer su mlađi ljudi imali posla na gruntu, štalu se išlo, na pole već pomalo, nisu imali vremena. Dok je završil križni put već se znalo vane smračiti, znalo se čak dogoditi da je tero mlađe dete kak je bilo umorno i zaspalo v cirkve. Tak mi je pripovedal Braco Kundić da je on jemput ko dečec zaspal, i bome se zavlekel nekam v čošek i ostal zaklejnut v cirkve. Onda kad se zbudil je vikal, negdo ga valda čul pa je mamica Cvetnićka otklejnula cirkvu. Nama dece je to onda bila zabava, društveni život, to nam je bila i molitva, ali stvarno i zabava. Mi smo četrdeset dan svaki dan slušali križni put, mladi mozak sve upija. Hoću reči da ja i den denes znam celi križni put napamet, a verujem i večina drugih koji su z nami molili.
– Moram još malo reči o Plavke, moje Ankice kak sam ju zvala, ja sam nju obožavala, ona je bila tak lepa, ko glumica, navek sam se za njom vlekla, bila je moj uzor u svemu. Nju su navek dečki obletavali, jer je bila ljepotica, na zabavama je bila glavna. Plavka je nama svima stvarno bila uzor, da je neka stara žena vodila križni put, nama to ne bi bilo zanimljivo. Na taj način širila se i vjera pri nami v Mraclinu, jer kad vidiš da tak neko ko ti je uzor, kak je nam bila Plavka, ide k meše, ide molit, onda ideš i ti. Jer denes nema ničega bez vjere. Mislim da ovo kaj mi danas zovemo napredak, ja mislim da je to nazadak, jer denes deca kad su i skupa, svi su na mobitelima, a mi kad smo molili križni put, gledeli smo se, slušali smo se. To je bilo divno, učili smo o vjeri, a da nismo ni bili svjesni. Plavka je bila iznimno plemenita žena, lijepa kak izvana, tak i znutra. I već kad sam odrasla, često sam se s njom spominala, bila je osoba koja je znala slušati, susretljiva, strpljiva, navek spremna pomoći čoveku. Neke stvari sam mogla samo njoj reči, požaliti se, navek je imela neki savjet i dala utešnu reč. Neizmjerno mi fali. Plavke denes više nema z nami, napustila nas je iznenada, u veljači prije točno dvajset let, no ostala su brojna sečanja na detinjstvo provedeno z njom.
– Zbog ovoga svega preporučila bi vam, dragim roditeljima, i dece, molete križni put, barem jemput tjedno dajte se skupite, da neka mlada cura vodi koja bu povlekla i mlađu decu. Bu vam lepo kak je bilo i nam s mojom Plavkom.
