Foto: povedime.info

Poštuvani,

kak je i negda bilo, tak se i ovoga leta na Jurjevskomu semnu, v starom gradu vu Lukavcu budu nagodili gospodar i sluga za leto dan. Pravi prikaz kak je to negda bilo dali vam budu isprobani i iskusni glumci Saša Robić i Nenad Lukić. Vse ovo bute mogli videti v nedelu, 24. travnja, iza 4 vure popoldan.

Stjepan pl. Čunčić

Pogodba sluge i gospodara na Jurjevskomu semnu

GOSPODAR (prema publike): Falen Isus i Marija. Je, je, naseveke faljen. Am vi znate i odgovoriti kak se šika. Bome vas je puno došlo, je, kej bi reči, je. I velite, vsi ste došli slavit našega Juru? Lepo je to, lepo. Em je Sveti Jura još navek zaštitnik našeg Turopolskoga banderija, a Banderij je pak odnavek čuval Turopolje. I zato je red dojti sim. Tak pak i ja. Kak i vsako leto, žena mi je pripravila čistu rubaču, čiste gače i torbu, i ja sem tu. Na Jurjevskom semnu. Obišel sem vse, čak sem več i tržil. Kupil sem si meda. Kak i vsako leto. Tu vam je pravi domači med. Je, znam, znam. Morete ga kupiti i v Konzumu, Kauflandu i kej ja znam de vse još. Je, al jel’ je tam pravi domači? Otkud je? Gdo to more znati? I velite da je jeftinejši neg sim? Am ne vse samo v penezi. Bome, ja sem moj med skupo platil. I preveč. Tržila ga nektera mlada sneja, tu, z bregov. Tak mi se lepo nasmejala i ja sem je mam platil kulko je god rekla. Bedak. One svoje doma nam niti rekel kuliko. Gdo zna kaj bi si vse mislila? A kak bi me tek špotala!  A vi me najte prepovedati. Vi mladi samo peneze gledite. Dobro, morti nekaj i znate. Jeste li sprobali gde je najbolša kotlovina? I kakovo je vino letos?

Je, pak ne smem pozabiti glavno po kej sem došel. Trebam si najti novoga slugu, drugoga svinara. Je, pitate se zakej nemam svinara? Kakvi je to turopolski gazda kaj nema slugu? I zakej me stari sluga ostavil? Nemrem zameriti dečecu. Oženili su ga i kej bu sad on? Mladu lepu sneju ostaviti samu doma ne red. A i bome je opasno. Od navek, a denes još i gorše. Denes bi ga začas ostavila če nebi bil dosta doma. Tak nek i bu. Tak je i bolše. Ja si bum novoga slugu našel, a on nek bu doma. I nek dela decu, em nas je i onak malo.

A kak bum ja znal gdo bi štel biti moj sluga, gdo išče gospodara, gdo bi se štel pogoditi za službu do drugoga Jurjeva? A kak vi to delate? Kak vi obznanite da ste fraj? Napišete na fejsu status: slobodan. A kak se to negda delalo? Nekteri to morti i neznaju, am fejsbuka ne bilo od navek. A vsejedno se živelo, još i bolše nek denes.

Gdo se je štel pogoditi za službu do drugoga Jurjeva, samo je na škrlak zateknul jorgovan. To je ono vaše: status slobodan. Jel’ morti vidite negde kakvog jakšega dečeca teri ima jorgovan za škrlakom? Gde? Tam dole? Idem ja mam do njega.

Bog dej!

SLUGA: I vami Bog dej dober den.

GOSPODAR: Je, kak vidim, imaš jorgovan. Ti bi se štel pogoditi za službu?

SLUGA: Je, bi. Ne mi više doma za biti, siročija je velika. I ja bi vam mogel biti dober sluga, jak sem, oču vse delati, a i pošten sem. Bolšega sluge od mene na semnu denes ne bute našli.

GOSPODAR: Naj se preveč faliti, to ti ne baš dobro.

SLUGA: A kej bi pak ja pri vami moral delati?

GOSPODAR: Vse kej bi ti se reklo, am kak drukčije. Ja pak trebam svinara, čuval buš moje svine v Turopolskom lugu.

SLUGA: A kuliko bi ja služil na leto?

GOSPODAR: Ti mam o penezi, vas mlade denes samo penezi zanimaju. A kuliko ti vrediš? Kuliko ti znaš? Ajde kuliko svinče ima nog? Jel možda šest? Ili osem?

SLUGA: Mi smo doma negda imeli svine, tak da ja dosti znam. Sad više nemamo, sad vsi kupuju v dučanu, iz uvoza, jeftineše, gdo zna kuliko let zmrznuto. Ali, nes vse pozabil.

GOSPODAR:  Dobro, onda reči kuliko nosi prasica? Mislim, kuliko treba čekati pajceke? Otkad ju je bicko podvičil?

SLUGA: Am je to bar lehko. To barem vsi znaju. Tri meseca, tri tjedna i tri dana.

GOSPODAR (prema publike): Bormeš, zna. I veli da vsi to znaju. Ne bi rekel. Gdo je to od vas znal? Nigdo! Tak sem si i mislil. Viš, ovi to zna. Kej vi mislite, jel’ bi ga zeti, jel’ bi se pogoditi?

SLUGA: I te vaše svine, gde bum ja to čuval, v Turopolskom lugu, am je to daleko, i gde bum ja spal?

GOSPODAR: Viš da niš neznaš. Mi pak odnavek v Lugu držimo svine. A i svinar ima svoju hižicu, pravu, trdnu, toplu, z rastove planki.

SLUGA: A kej bum ja jel?

GOSPODAR: Jemput na tjeden ti ja donesem brašno. Kukurizne mele, masti, špeka, bažula, luka, krampera, soli, gajsa. Imaš lonce za kuhati, če neznaš buš se brzo navčil, bu te glad natirala. Gladni brzo vuči.

SLUGA: A za popiti? Sigurno imate i trsje, pak mora i za mene biti kakvoga vina?

GOSPODAR: Gleč njega! On bi pil! Jel ti imaš osemnajst? Ja pak ne bi štel iti vrešt. Denes ti je vse opasno!

SLUGA: Let imam dosta. Nek, valda bu i malo i rakije, mislim če me zub zaboli.

GOSPODAR (prema publike):Pak on. Če ovak nastavi, taj bu začas štel i sindikat.

Dobro, dobro, litru vina na tjeden buš dobil. A rakije samo za svetke.

SLUGA: A kak se bum ja grel? Zima bu skoro došla!

GOSPODAR (prema publike): Jel ovi točen?

Pak gdo je videl drva v šumu nositi. Am ti je šuma puna drvi!

SLUGA: Je, znam ja, znam. Ali znam da lugari denes očeju sešta pitati. Gde mi je dozvola za seči, izvoznica, otpremnica, račun, je li pedeve plačen? Am denes v šume nesmeš nit jednoga vrganja vbrati bez dozvole.

GOSPODAR: Ti lugaru samo reči da si svinar Pavla Čunčića z Mraclina. I vse bu dobro. Kuliko sem put ja litru zval v bertije, i kuliko sam samo svega najbolšega vina im se nanosil. Samo tak reči i ne boj se niš.

SLUGA: A cigaretlini? Pušim kutiju na dan, negda i više!

GOSPODAR (prema publike): Pak on! Jel’ tomu ima kreja?

To se sigurno nebumo pogodili. Barem se denes zna da pušiti ne zdravo. Nu, ovo nesmeš pripovedati. Ima tam semena duhana, buš si zasadil i buš imel za pušiti. Jedino, če te financi vloviju, ja za to niš neznam. A one vaše gluposti, kej vi mladi spelavate, trava, marica, kak vi to zovete, če ti to najdem, to ti bum ja mam spukal. Za to neču ni čuti.

SLUGA: A tam, vu tom vašem lugu, jel tam opče ima kakvoga ženskoga sveta? Znate, mene i to zanima.

GOSPODAR (prema publike): Sad još ovi i za ženske spiteva! Dobro je, moglo bi biti još i gorše.

Je, tam smo mi Turopolci skrčili senokošu još negda, denes se to zove Vratovo. Tam dojdu blaga past i dekle, i sneje, a i bude i vdovic. Samo z deklami moraš paziti, da se nebi ženil i pre nek bi štel. Ze snejami je opasno, kej muži znaju biti fest lubomorni. Jednoga slugu, teri ne pazil, su mi stukli tak da se celu zimu vlekel kej prebit cucek. A z vdovicami se čuvaj da se nebi preveč zaigrali, pak ti svine otideju v kvar. Če bum kakvu škodu moral plačati, skratil ti bum vino na mesec dan, a morti i na tri.

SLUGA: A kletu, za Jurjevo, gda bum i plaču dobil, jel si bum mogel zebrati teroga bolšega lanjščaka, kej bi svojem domom dognal, da se i oni počastiju?

GOSPODAR: Zebrati ne buš mogel, najbolše svine idu za seme, za rasplod. Al ti bum ja takvoga pečenca dal da se ne buš žalil.

SLUGA: Dobro onda, al na koncu konca, oču znati kuliko bu moja plača?

GOSPODAR: Sto forinti kletu na Jurjevo, kak je i odnavek bila plača za dobroga slugu.

SLUGA: Ak’ nemre biti više, nek bu i tak.

GOSPODAR: Dej onda ruku, da manemo.

Gospodar i sluga si čvrsto daju ruku i jako maneju.

GOSPODAR: I znaš kej ti je sad delati?

SLUGA (prema publike): Ovi mam več nekej oče! Jel’ bu to dobro?

GOSPODAR: Sad kad si manul, nesi više fraj. Jorgovan mora proč.

Sluga zimle jorgovan ze škrlaka.

GOSPODAR: Sad idemo nazaj na semen, bum naručil litru vina da se zna da smo se pogodili.

Za Jurjevo, leta Gosponovoga 2015.

Facebook komentari

Komentiraj

Please enter your comment!
Please enter your name here

Ova web-stranica koristi Akismet za zaštitu protiv spama. Saznajte kako se obrađuju podaci komentara.