Pedeset let ležal je tkalački stan na mojem najžu. Ne ga više trebalo, rupci se više ne prodavaju, tepije isto tak više nejdu. Nu, jel bi se moglo nekaj probati? A da ja to složim, čardak samo čeka da se vu njem nekaj događa? A gdo bi još znal tkati, jel imam sve kaj treba? I gdo bu tkal?
Zval sem Matiju. Jel bi mi Dučec mogel pomoči i jel im kaj treba? Za pomoč tak tak, nu ima još žen kaj to sve znaju. A trebali bi im lički fertuni. Začas sem bil pri Barice Kovačić Malenine. Žena stvarno puno zna, a oče i pomoči. Brže sem složil stan, sve sem našel, i ničenice, i brdo, i čunke. Sve je moja pokojna mama Slava dela na stranu i vu škrinje.
Nu, film mora biti napet. Barek veli: ja ti oču pomoči, ali na čardak nemrem, kuk me boli. V Novom Čiču ima tkalačka radionica, oni sigurno sve znaju. Je, mi, kad se navija, dopelamo ženu z Posavskih Bregof, moremo ti dati broj. Kak, da mi v Mraclinu, negda najjakšem selu po tkanju v cele okolice, da idemo v Posavske Brege prosit pomoč? Nemre i nesme.
Raskopal sem stan i ponovo složil, ovaj put dole v čardaku. Gde naša vučitelica Barek more dojti. Dobro, nes bil sam, imel sam Filipa teri mi je puno pomogel. I verujem, bu još puno. Dogovorili smo se za subotu, 15. ožujka.
Več v pet vur jutro sem zakuril, da nam nebu zima. I svi su došli. Onda se videlo da sem ja to sve nekak preveč jednostavno zamislil. Konoplena preja se nemre samo tak navijati na stan. Treba ju prvo premotati na klupka. To smo mi delali celi dan. I još ne gotovo. Al bilo nam je toplo, bilo je živo, veselo i dosta kolačof. Posle nam je moja žena Branka priredila obed. Tu nas je bilo trinajst.
Kaj nam je dalše za delati? Premotati na klupka još jedno povesmo. Onda nabaviti snovaču i složiti. Snovalo se bude za dva, tri tjedna, to bute več znali. Osnutek treba navinuti na stan. Posle navoditi čez ničenice i brdo. I onda bi se moglo tkati. Če nabavimo čunke za vunu (toga vam v Mraclinu ne bilo) i sedem kil vune.
Sve su dečki poslikali tak da morete videti gdo je sve bil pri poslu. Isto tak, mogli bi pogledati na najžima, otpreti stare škrinje i videti kaj bi još moglo zatrebati.I morete se javiti. Vrednih ruk nigdar preveč. A sigurno bumo puno i navčili.
Do ponovnog tkanja,
Stjepan pl. Čunčić
Foto i video: KUD Dučec Mraclin
