Foto: Vesna Tafra (arhiva 2018.)

Plemenita sučija Mraclin v suradnji z KUD-om Dučec organizira paljenje Jurjevskog kresa v Šabariću, 22. travnja, na Vuzmeni pondelek, večer pred Jurjevo. Počeli bi ob sedme vure navečer (19 h) i to z baloni za drobnu dečicu, a onda bumo, kak i do sad, videli „Pogodbu gospodara i sluge na Jurjevskomu semnu“.

Oko osme vure bi vužgali kres, a za to bumo zadužili naš Turopolski banderij, koji bu nas čuval i branil celu večer. Još od negda su se dečki kazali pred deklami gdo je spretnejši tak da su skakali prek ogna. Prilike bu i za to.

Mam po tomu imamo posebne goste i posebnu priliku: oni nam budu prikazali “Kajkavski putešestvium”, poetski putopis kajkavskoga pajdaša z Međimurja, Leonarda Čečija Bakse.

A kaj vam je tu na stvari? To je zapraf bilo tak da se jen međimurski potepuh, “mužikant i pesmodelec, i fiškal i ponorelec” zaputil s kraja na kraj kajkavske domovine, da bi si med ljudimi dobre volje poiskal malo sreče. Ovo nam bude foršpan ilitiga predpromocija te knižne, scenske, ali i mužikaške spelancije: prvo budemo čuli kak je potepuh prešel z Međimurja v beli svet, kak su ga dočekali purgeri, posle njih Zagorci, i kak su ga onda dočekali Turopolci, kam se trefil baš za Jurjevo. To nam budu pretstavila renomirana imena naše pozornice – Mirko Žiga Švenda, Andrea Baković, Goran Grgić; a preštimanom ansamblu budu se pridružile i turopoljske snage – Drago pl. Katulić z Buševca i Tamburaški sastav Dučeca.

Posle toga bumo imeli službenu promociju „turopolskih prigrizkov“ iliti „turopoljskih kanapeića“, kak vam je dražeše. Nakon probe na Gastru Velike Gorice 2018. imeli smo fest pozitivne reakcije, a kaj je to za praf, budete videli. Pravilo vsake prave fešte se zna: dobroga vina nigdar preveč. Prosimo sponzore, teri se imaju s čim pofaliti, da se iskažu. K tomu i sve ostanjke vuzmenog stola, posebno šunke, bumo ekološki zbrinuli, i unapred  zafaljujemo. I kolači su dobrodošli.

Očekuju se Dobre duše (a kak bi se to nekaj v Mraclinu spelavalo bez njih?), a jake snage Dučeca uz Tamburaški sastav budu još i Dječja folklorna skupina i Ženski vokalni sastav. Pozovete i prijatele, v Šabariću ima mesta za vse!