Tkalački stan

Čera mi je došla nuka Lucija i kad je videla da pišem pitala me:

– „Baka, ke sad pišeš? “
– „O konople. “ – velim
– „Ali baka, ke ne viš da delaju probleme ovima kaj se baviju z konoplum? “
– „ A ne, zlato moje, jo se nem bovila z konoplom tera se uzgoja za drogu ili lek, jo bum pisala o konople teru ludi poznaju oko 5000 let upotreblovaju ju za tkojne čvrstoga i otpornoga plotna z terog se negda šivala obleča, stolnaki, plote, ručniki i se drugo ke je trebalo biti joko. Takvo plotno je bilo dugotrajno.“

Povesma iz filma Jedan dan u turopoljskoj zadruzi

Konopla se v Turopolu sejala rano v proleču, pot kraj ožujka ili na početku trovna. Sejala se v rede z sejačum. Konopla brzo raste pok se več na početku kolovoza išla kosit. Pokošena konopla vezala se v snope i na koli se vozila v Novo Čiče na namokajne (denes to zovu maceracija). Tak su snopi stoli v vode dok se ni omekšal zeleni dil – mislim jen tjeden ili dvo. Onda se vodila z vode vozila v Mraclin na strnišče da se posuši.

Sečam se, kad sem bila mola, išla sam z tetum i tecom v Čiče po konoplu. Takva mokra, baš je joko smrdela, pak sem pitala tetu :

– „A zoke moramu voziti konoplu v Čiče kad i v Mraclinu imamu vodu – Obdinu?“
– „Mola moja, rekla je teta, to ti je zoto ke za namokajne konople mora biti čista voda tera stoji, zovu ju stajačica. Naša Obdina teče, a ak opadne kiša, ona se zamuti i to ni dobro za konoplu. V Čiču je šuder i pesek, voda je mirna i čista i zoto ju vozimu v Čiče.“
Jo mislim da smu ju mi to vozili na mesto de je denes jezero Čiče, tero i je nastalo zoto ke se tam kopal šuder i pesek.

Stupa

Namočenu konoplu dovezli smu na strnišče, poslagali snope da stoje i ostavili da se suše. Kad su se posušili, dovezli su se domom, v štogel na suvo.

Onda je tetec Lacko složil stupu i popoldan se konopla tukla. To je dosta teški posel jer je stupa teška, pa su to obično delali mlodi dečki: bratič Dragec Franekof i negvi prijateli. Oni su mu navek rado pomogali. On ih je nudil z vinom, a oni su pripovedali sekakve šole, smejali se i brzo i leko obavili taj posel. Teta je snope metala pod stupu, a oni su ih tukli.

Drugi don teta je z trlicum trla i odvojala pozder z povesma, ali se još moralo i česati na greben da bi taj pozder otpal. Tek je takvo čisto i prečesano povesmo kudele bilo spremno za predejne. Presti su znale skoro se žene i mene je žal ke se jo nis nafčila presti.

Povesmo kudele se namotalo na drvenu preslicu, tera je bila tak lepa, zrezborena kak da je od čipke. Z jednum rukum se vrtelo vreteno med prsti, a z drugum se zimalo malo po malo povesma, vrtelo med prsti, malo pomočilo z slinum i na vretenu se začas namotala lepa vrpa preje.

Trlica

Preja je mogla biti deblja ak se tkalo grubo plotno ili tenka za fineša plotna.

Preja se snovala na snovače i navijala na ston, a negda se kakti osnova snoval ježek, a tkalo se z prejum prema tomu za ke se plotno tkalo. Konoplino plotno je čvrsto, izdržlivo i zoto su se ž nega šivale vreče za žitek, torbe, fertuni za posel – kobernoki, radno ruho za celu družinu, plote, ručniki i se drugo ke je moralo biti joko i dugotrajno.

Negda se ni mogel ni zamisliti život bez konoplenoga plotna pa je bilo normalno da se konopla sejala i uzgojala puno, puno let – kok bi rekli naši stori: „od kad je sveta i veka!“.

Kolovrat